Այսօր Երևանի Կարեն Դեմիրճյանի անվան մարզահամերգային համալիրում մեկնարկեց Հայաստան-Սփյուռք 6-րդ համաժողովը, որին մասնակցում են 71 երկրներից ժամանած 1500-ից ավելի պատվիրակներ:
«Փոխադարձ վստահություն, միասնականություն և պատասխանատվություն» խորագրով համաժողովի հանդիսավոր բացումն սկսվեց ՀՀ Սփյուռքի նախարար Հրանուշ Հակոբյանի ելույթով:
Համաժողովի թեմատիկ նիստերը կազմակերպվում են չորս ուղղություններով՝
1. Հայաստանի զարգացման հիմնախնդիրներ,
2. ՀՀ պաշտպանական քաղաքականության առանձնահատկությունները ժամանակակից մարտահրավերների պայմաններում,
3. Արտաքին քաղաքականության օրակարգ,
4. Հայապահպանության հիմնախնդիրներ:
Հանրային դիվանագիտության դպրոցի տնօրեն Տիգրան Շադունցը մասնակցեց ինչպես լիագումար նիստին, այնպես էլ թեմատիկ նիստերում կազմակերպվող մի քանի քննարկումներին: Մասնավորապես՝ դպրոցի տնօրենի համար հետաքրքրական էին այն թեմաները, որոնք քննարկվում են իր ղեկավարած կառույցում: Իր խոսքում Տիգրան Շադունցը կարևորեց նման միջոցառման դերն ու նշանակությունը համահայկական իրականության մեջ՝ մեջբերելով ՀՀ Նախագահի խոսքը. «Արդի աշխարհի փոփոխությունների համատեքստում մենք պետք է նորովի դիտարկենք մեր սփյուռքի «փափուկ ուժը» և հանրային դիվանագիտության կարողությունները՝ պաշտոնական դիվանագիտությունն առավել զորացնելու համար»:
Ս.թ. սեպտեմբերի 18-ից 20-ն անցկացվող Հայաստան-Սփյուռք 6-րդ համաժողովի ծրագրով, բացի ոլորտային խնդիրների քննարկումներից, Համահայկական խորհրդի ստեղծումից, նախատեսված են նաև մի շարք մշակութային երեկոներ, համերգներ, հանդիպումներ և այլ միջոցառումները:
