Գնահատենք եւ պահպանենք մեր արժեքները

Մենք միշտ հպարտանում ենք մեր մշակույթով, պատմամշակութային վայրերով, ճարտարապետական կոթողներով, մեր Մասիսով, Սեւանով, մեր մեծերով...

Սակայն ի՞նչ կասեին այդ մեծերը, երբ այսօր քայլեին Հայաստանի փողոցներով կամ լինեին բնության գրկում, կամ էլ այդ պատմամշակութային վայրերի ու կոթողների հարակից տարածքներում: Այդտեղ կուտակված աղբը տեսնելով, թերեւս, ցավ զգային, խոր վիշտ... իսկ կապուտաչյա Սեւանը, որ հայ ազգի հպարտությունն է, լուռ սպասում է, որ իր մասին էլ հիշեն... ու հիշեցին: 

Let’s Do It World համաշխարհային էկոլոգիական շարժման «Մաքրենք Աշխարհը-2012» արշավի մաս կազմող և «Մենք կարող ենք» (Let’s do it! Armenia) շարժման կողմից իրականացվող` «Հայաստանն առանց աղբի» կամավորական նախաձեռնության շրջանակներում եւ որպես Ֆրանսիայում վերջերս տեղի ունեցած` «Environmental Education: Let’s be concerned!» («Բնապահպանական կրթություն.եկեք լինենք ներգրավված») ուսուցողական ծրագրի արդյունք-շարունակություն` սեպտեմբերի 15-ին` «Սերունդ համահայկական երիտասարդական կենտրոնի» եւ «Ժայռ» համահայկական երիտասարդական կազմակերպության անդամներն այցելեցին Սեւան: Այցը բնապահպանական նպատակ ուներ: 

Շուրջ 50 երիտասարդների ջանքերով հանվեցին եւ տեղափոխվեցին` ջրի մակարդակի բարձրանալուց հետո անմիջապես ափին հայտնված եւ կիսով չափ ջրի տակ մնացած ծառերը:

Երիտասարդ սերունդը վստահ է, որ յուրաքանչյուր մարդ պետք է գնահատի եւ պահպանի արժեքները, իր պարտքը համարի հոգ տանել շրջակա միջավայրի մասին եւ դա անի ամեն օր, այլ ոչ միայն առիթից առիթ:

Ջ. Կազումյան