Սույն թվականի մայիսի 28-ին Գյումրու Մեղվիկ մանկապատանեկան հասարակական կազմակերպության գրասենյակում անցկացվեցին ՌԳՄԿ-ին կից գործող Իրավագիտության դպրոցի Գյումրու մասնաճյուղի առաջին խմբի հերթական վարպետաց դասերը, որոնք վարում էին ՀՀ Վերաքննիչ քաղաքացիական դատարանի իրավական փորձաքննությունների ծառայության ղեկավար Դավիթ Բայրամյանը «Դատական փաստաթղթերի կազմում» և փորձագետ Տաթև Ավագյանը «Նոտարական գործարքների առանձնահատկությունները» թեմաների համատեքստում:
Վարպետաց դասի առաջին մասում փորձագետ Տաթև Ավագյանը ներկայացրեց Նոտարիատի մասին ՀՀ օրենքով կարգավորվող նոտարական գործունեությունը, որտեղ ներկայացվեց նոտարական գործունեության էությունը, այդ գործունեության գաղտնիությունը, նոտարի պաշտոնում նշանակվելու կարգը, ինչպես նաև նոտարի պաշտոնավարելու սկիզբը, նրա գործունեության սահմանափակումները, հստակ մեկնաբանվեց նոտարի կողմից մատուցվող վճարովի ծառայությունները (պետական տուրք և ծառայության վճար), նոտարի իրավունքները, պարտականությունները, պատասխանատվությունը:
Մանրամասն ներկայացվեց նոտարական գործարքների վավերացումը, նոտարական կարգով վավերացվող գործարքները՝ կտակի, լիազորագրի վավերացումը: Վարպետաց դասի առաջին մասը ամփոփվեց թեմայի շրջանակներում առաջադրված խնդիրների շուրջ քննարկումներով:
